پشاور، قبرستانوں میں تجاوزات کیخلاف کریک ڈاؤن جاری

بیری باغ، بیجو قبرستان اور زاہد آباد میں قبرستانوں میں 59 مرلہ اراضی پر قائم تجاوزات مسمار‘ کار سرکار میں مداخلت پر 3افراد گرفتار

پشاور(اُردو پوائنٹ اخبارتازہ ترین – این این آئی۔ 21 نومبر2023ء) صوبائی دارلحکومت پشاور میں ڈپٹی کمشنر پشاور آفاق وزیر کی ہدایت پر ایڈمنسٹریٹر اوقاف حامد گگیانی اور ایڈیشنل اسسٹنٹ کمشنر سلیم ایوبی نے بیری باغ، بیجو قبرستان اور زاہد آباد کے علاقے میں قبرستانوں میں قائم تجاوزات کے خلاف آپریشن کرتے ہوئے 59 مرلے پر قائم تجاوزات کا خاتمہ کر دیا جبکہ کار سرکار میں مداخلت پر 03 افراد کو گرفتار کر لیا گیا۔آپریشن کے دوران کسی بھی ناخوشگوار واقع سے بچنے کے لیے پولیس کی بھاری نفری کو تعینات کیا گیا تھا۔

ڈپٹی کمشنر پشاور آفاق وزیرکے مطابق قبرستانوں میں تجاوزات قائم کی گئی تھیں اور ان افراد کو کئی بار نوٹس دیے گئے تھے کہ وہ بذات خود اپنی تجاوزات ہٹا دیں لیکن ان پر کو ئی اثر نہیں ہو رہا تھا جس پر ضلعی انتظامیہ نے آپریشن کرتے ہوئے تجاوزات کا خاتمہ کرتے ہوئے 59 مرلے پر قائم تجاوزات کو ہٹا دیا۔ڈپٹی کمشنر پشاورآفاق وزیر نے افسران کو ہدایت کی ہے کہ وہ روزانہ کی بنیاد پربازاروں اور دیگر مقامات کا معائنہ کریں اور دوبارہ تجاوزات قائم کرنے والوں کو جیل بجھوایا جائے۔