پشاور انسٹیٹیوٹ آف کارڈیالوجی کا صحت کارڈ کے تحت علاج روکنے کا عندیہ

پشاور انسٹیٹیوٹ آف کارڈیالوجی کا صحت کارڈ کے تحت علاج روکنے کا عندیہ

صوبائی دارالحکومت پشاور میں واقع اپنی نوعیت کے بہترین طبی سنٹر پشاور انسٹیٹیوٹ آف کارڈیالوجی کا صحت کارڈ کے تحت علاج معالجہ کی سہولت روکنے کا عندیہ دیا گیا ہے، اور یہ اقدام فنڈز کی عدم ادائیگی کی وجہ سے اٹھایا گیا ہے۔
پشاور انسٹیٹیوٹ آف کارڈیالوجی نے صحت کارڈ پرعلاج سےمتعلق سٹیٹ لائف انشورنس کو خط بھیجا ہے، جس میں ادائیگی کا مطالبہ کیا گیا ہے، اور کہا گیاہے کہ ادائیگی نہ ہوئی تو یکم اکتوبر سے صحت کارڈ پرعلاج نہیں کریں گے۔
پی آئی سی کے مطابق سٹیٹ لائف انشورنس کے ذمے ڈیڑھ ارب روپےکے بقایات ہیں، بقایاجات کی ادائیگی نہ ہونے سے ہسپتال میں ادویات اور سامان کی فراہمی متاثر ہوئی جبکہ سٹیٹ لائف انشورنس کا نیا معاہدہ بھی قابل غور نہیں ہے۔
دوسری جانب صوبائی حکومت نے بقایاجات کی مد میں انشورنس کمپنی کو 12 ارب روپے جاری نہیں کیے، اس حوالے سے محکمہ صحت کے حکام کا کہنا ہے کہ مالی مشکلات کے باعث صوبائی حکومت کو صحت کارڈ میں مشکلات ہیں، صحت کارڈ کی مد میں تمام ادائیگیاں کرنے کی کوشش کر رہےہیں۔

Publisher