واٹس ایپ نے ملٹی اکاؤنٹ سپورٹ کا فیچر متعارف کرا دیا

صارفین واٹس ایپ سیٹنگز میں ڈاؤن ایرو پر کلک کرکے مختلف اکاؤنٹس پر سوئچ کر سکیں گے

دنیا کی مقبول ترین سماجی رابطوں کے پلیٹ فارم واٹس ایپ کی جانب سے ملٹی اکاؤنٹ سپورٹ کا فیچر متعارف کرا دیا گیا۔

سماء ویب ڈیسک : تفصیلات کے مطابق 2 ارب سے زیادہ صارفین رکھنے والے واٹس ایپ اپیلی کیشن میںایک ڈیوائس کے لیے ملٹی اکاؤنٹ سپورٹ موجود نہیں تھی، تاہم اب واٹس ایپ نے ملٹی اکاؤنٹ سپورٹ کا فیچر متعارف کرا دیا ہے۔

خیال رہے کہ ایک فون میں 2 واٹس ایپ اکاؤنٹ استعمال کرنے کے لیے ایپ کی سیکنڈری کاپی بنانا پڑتی ہے جو آسان کام نہیں،مگر میٹا کی زیرملکیت میسجنگ ایپ کی یہ خامی اب دور ہونے والی ہے،واٹس ایپ کی جانب سے ملٹی اکاؤنٹ سپورٹ کا فیچر متعارف کرا دیا گیا ہے۔

ویب بیٹا انفو کے مطابق ملٹی اکاؤنٹ سپورٹ کا فیچر اینڈرائیڈ ڈیوائسز کے لیے بیٹا (beta) ورژن میں متعارف کرایا گیا ہے جو ابھی چند صارفین کو دستیاب ہے۔اس فیچر کے ذریعے صارفین ایک ہی فون میں کئی واٹس ایپ اکاؤنٹس پر لاگ ان ہو سکیں گے۔

ویب سائٹ کے مطابق اس فیچر کے ذریعے صارفین واٹس ایپ سیٹنگز مینیو میں اپنے نام کے آگے بنے ڈاؤن ایرو پر کلک کرکے مختلف اکاؤنٹس پر سوئچ کر سکیں گے یا نئے اکاؤنٹس کو ایڈ کر سکیں گے۔

بیٹا انفو کے مطابق یہ فیچر ان افراد کے لیے بہترین ثابت ہوگا جو واٹس ایپ کو دفتری سرگرمیوں کے لیے بھی استعمال کرتے ہیں، ملٹی اکاؤنٹ سپورٹ سے وہ دفتری اور ذاتی زندگی کے لیے الگ اکاؤنٹس استعمال کر سکیں گے۔