cinema culture in peshawar
اک وخت ایا کہ فلم بینی یا سینما جانڑیں دا شوق عروج تے ہوندا ایا لوک دوستاں دے نال یا فیملی دے نال ہفتہ اچ اک وار ضرور سینما جاندے ساڈے جئے فارغ ہفتہ وُن دو یا ترے وار بی چلے جاندے فیملی ہووے تے گیلری یا بوکس دے ٹکٹ لیندے نئیں تا فرسٹ کلاس تے سستی ٹکٹ وسے سیکنڈ کلاس بالکل پردے دے نال گردن اکڑا کے بیٹھڑاں ہوندا ایا وت بی اک بہترین مشغلہ ایا ٹکٹ دے بعد اگلا خرچہ ہاف ٹائم دا ایا جس اُچ لوک چائے تے پیپسی وغیرہ دے نال لطف اندوز ہوندے تے خالی جیب اندر لگی ہوئی فلم دے کلپس دی تصویراں دیکھ کے اندازہ لگاندے کہ کیہڑا پارٹ گزر گیا تے کیہڑا باقی اے۔ پشور اُچ بی بوت سینما ائے جییہڑے کہ وخت دے نال نال ختم ہوندے گئے میری یاداشت اُچ جیہڑا پہلا سینما بند ہویا اوہ پشور یونیورسٹی اچ ایا۔ پاکستان اُچ کسی بی یونیورسٹی دے اندر سینما ہونڑاں اک تعجب دی گل اے تے اتھے گل ہوندی پئی اے پشور دی جتھے ثقافت تے گہری نظر رکھڑیں ولے آں دے مطابق پشور یونیورسٹی اچ اک زمانے اچ سینما ہویا ہوندا ایا۔
پشور یونیورسٹی دی جدو بنیاد رکھی گئی تے بنیاد رکھڑیں دے بعد ای پشور یونیورسٹی اچ سینما ہال بنڑایا گیا ایا۔ جس نوں آغا خان ہال کہیا جاندا وے۔ ماضی اچ ہر اک یونیورسٹی اچ طلبہ نوں تفریح فراہم کرنے وسے تھیٹر ہال ہویا ہوندا ایا۔ جس اُچ سٹیج ڈرامے سمیت فلماں بی دکھائی جاندیاں وُن، لیکن پشور یونیورسٹی اچ قائم سینما ہونڑ قصہ پارینہ بنڑ چکا وے۔ جد کہ تاریخ داناں دے مطابق پشور دا قدیم سینما امپریل تھیٹر قصہ خوانی پشور اُچ ایا جتھے پہلی بول دی ہوئی فلم عالم را لگی ائی۔
پشور چھائونی اچ پی ایف سینما سویلے دس وجے دے شو تے سستی ٹکٹ وسے بوت مشہور ایا جیہڑے سٹوڈنٹ سکول کالج سی چھپ دے تے اتھے پائے جاندے۔ ارباب روڈ تے کیپٹل سینما جس دے پردے دے اُتے جڑواں بت نصب ائے لوکاں دا کیہنڑایا کہ اے سینما سی زیادہ قیمتی اُن ہونڑ تے نہ بت رئے نہ سینما پشور صدر دے مین بزار اُچ فلک سیر سینما بی قصہ پارینہ بنڑ چکا وے۔ اس دی جگہ اک وڈا پلازہ وجود اُچ آ چکا وے پہلے اس سینما دا نام شاید لینڈز ڈان ایا بعد اُچ فلک سیر سینما رکھ دتا گیا ایا اناں دونوں سینما کہاراں اچ صرف انگریزی زبان دی فلماں چلائی جاندی ائیاں ۔ پشور شہر اُچ لیڈی ریڈنگ اسپتال دے نزیک اُچ ناز سینما وے جس دا پرانڑاں نام روز سینما ایا سب سی زیادہ سینما دا نام ” ناز ” ایا پاکستان اُچ اس نام دے پینتیس سینما ہال ائے۔
بقول ساڈے دوست شاہ جی سید تنویر کاظمی صاحب نازسینما نوں سکھاں ولا سینما کہیا جاندا ایا اس سینما کہار اُچ بی اکثریتی انگریزی فلماں ای نمائش وسے پیش کیتی جاندیاں اس وخت اے واحد تھری ڈی سینما وے شہر اُچ فردوس سینما واقع ایا آغہ جی اے گل نے اس نوں بنڑایا جو 1945 اچ بنڑنا شروع ہویا تے قیام پاکستان دے بعد مکمل ہویا۔ جس دا نام بعد اُچ تبدیل ہو کر شبستان کر دتا گیا اے اک شاندار سینما ایا جتھے فردوس سینما ایا اج بی اس چوک دا نام فردوس سینما چوک اے حالانکہ سینما نوں پن کے اس دی جگہ بوت وڈا پلازا بنڑایا گیا اے اوہ مقام اے جتھے دیوالاں تے فلماں اچ لڑائی مارکٹائی دی تصویراں ایجئی اویزاں یا چسپاں ہوندی ائیاں کہ دور دور سی نظر آندی ائیاں۔ جد کہ تھوڑا اگے جا کے میٹرو سینما ہوندا ایا جیہڑا یہ ماضی دا حصہ بنڑ چکا وے کابلی گیٹ دے اندر سینما روڈ تے ترے سینما کہار ہوندے ائے جناں دے نام ائے پکچر ہائوس، ناولٹی تے تصویر محل سارے سینما کہاراں ہونڑ صرف پکچر ہائوس بچاوے خیبر بزار اُچ امان سینما آپڑی منفرد بلڈنگ دی وجہ نال مشہور ایا وت امان سی پلوشہ تے پلوشہ سی میڈیکل سنٹر بنڑ گیا اس دے نال ای ارشد ینہ تے صابرینہ فی الحال قام اُن، شمع سینما بی آپڑی منفرد فلماں دی وجہ نال چل دا پیا وے۔ گلبہار اُچ عشرت سینما دی تعمیر ساڈے سامڑیں ہوئی تے ہونڑ اوہ بی شادی ہال بنڑ چکا وے۔ فلمی صنعت دا گولڈن دور اس دی دہائی تکل رہیا اس دور اُچ فلم سنسر بورڈ دی قینچی بڑی تیزی ائی تے کسی فلم ساز دی اے مجال نی ائی کہ اوہ مخرب الاخلاق فلم نمائش وسے پیش کر سکے اس دور اُچ ایجئی صاف ستھری فلماں بنڑدی ائیاں جیہڑا سارے اہل خانہ اکٹھا بیٹھ کے دیکھ سکدے ائے۔
ہزاراں لوکاں دا روزگار اناں سینما کہاراں دے نال جُڑا ہویا ہوندا ایا اس زمانے اچ بنڑنے ولی پاکستانی فلماں دا معیار اس وسے اُچا ایا کہ پاکستانی فلماں دے معیار دے ٹیہڑیں دی اک وجہ اے بی ائی کہ جدو ساڈی فلم انڈسٹری نے غیر معیاری فلماں بنڑنا شروع کیتیاں تے ملک اُچ وی سی آر دا چلن عام ہویا تے سینما بیناں نے سینما کہاراں دا رُخ چھوڑ دتا جدو سینما کہاراں دے مالکان دا کاروبار ٹہہ پیا تے اُناں نے یا تے آپڑے سینما کہار ویچ دتے تے یا وت اناں نوں میرج ہالز یا پلازیاں اچ تبدیل کر دتا۔ اس طراں فلم انڈسٹری بی بری طراں متاثر ہوئی تے فلماں بنڑنا بند ہو گئیاں پہلے جتھے سال اُچ درجناں فلماں بنڑ دی ائیاں ہونڑ مشکل نال گنڑی چنڑی تے غیرمعیاری فلماں بنڑ دیاں وُن، پشور اُچ اس وخت جیہڑے سینما ہال چل دے پئین اناں نوں پشتو فلماں نے سہارا دتا ہویا وے۔
شکریہ
پشاور میں گیس بحران شدت اختیار کرگیا، بچے بغیر ناشتے سکول جانے پر مجبور پشاور…
خیبرپختونخوا کے 14شہروں میں الیکٹرک بس سروس کا منصوبہ، پہلے مرحلے میں 6 شہر شامل…
پاکستان تاریخی سنگ میل سے چند روز کی دوری پر، پہلا خلا باز 25 نومبر…
سمندر میں انٹرنیٹ کی اہم سب میرین کیبل میں خرابی، صارفین کو سست رفتار اور…
خیبر پختونخوا میں ڈینگی وائرس کیسز کی تعداد 6 ہزار سے تجاوز کر گئی پشاور(…
پشاور میں مبینہ جعلی میڈیکل کونسل پر ایف آئی اے کا چھاپہ، چیئرمین گرفتار پشاور:…