Peshawar Birds
رانی تے شاہد دی اک فلم شاید ثریا بھوپالی دیکھی ہوسی اس اُچ رنگیلے دا بٹیرا ہار جاندا وے تے اوہ اس نوں کو دیندا وے۔ شاید اے بٹیر بازی بی سانوں مغلاں سی ورثے اچ ملی اے اس بارے اچ گوگل چھانڑاں تے پتہ چلا کہ کسی زمانے اچ میرا سوہنڑاں شہر پشور اس دا وڈا مرکز ایا تے مزید معلومات نہ مل سکیاں کہ بٹیر بازی تے بوت سارے آرٹیکل لکھے جا چکے ہوسُن تے کُش منفرد ہووے تے جدو گل پشور دی ہووے تے وت آپڑے گروپ پشوریاں دی ثقافت دے سینئر دوستاں دی یاداں اکٹھی کرنے دا سوچا تے اک پوسٹ لگا دتی تے دوستاں نے یاداں دی برسات کر دتی۔ پہلا وڈا فنی کمنٹ، ام ایان صاحبہ نے کیتا کہ اَسی نکے ہوندیاں دیکھ نے ایاں کہ بٹیرے چُک کے کُش لوک سراج الحق صیب دی طراں ڈینگی ٹوپی تے پنجہ دار چپلی پا کے کریم پورے بزار اُچ نظراں تے ہتھاں اچ انگوٹھیاں تے موڈھے تے رومال ہتھ اُچ پنجرہ پکڑے بیٹھے ہوندے ائے اَسی سکول جاندے ہوئے اناں سی ڈر نے ایاں۔ طارق اعوان صیب نے بتایا کہ جی ہاں اے بی اک وخت ایا جدو پشور دے ہر دوئے بندے دے ہتھ اچ بٹیرا ہوندا ایا تے نال کلائی تے خلتہ بندھا ہوندا ایا نے تے جدو بٹریاں دی لڑائی وچ کوئی بٹیرے ہار کے نس دا ایا تے وت لوک اس بٹیرے نوں کیہندے ائے کہ پگیلا ہو گیا وے۔
سکندر لالا دا کمنٹ: جی ہاں اے جیہڑا ساڈا کہار اے نوتھیہ اچ اے بٹیر بازی دا اکھاڑا ایا بعد اُچ اے اکھاڑا کوٹلہ محسن خان اُچ ایا تے اناں بٹیریاں تے وڈی وڈی بازیاں لگ دی ایاں جیہڑا بٹیرا نس جاندا ایا او نوں پھگیلہ کیہندے ائے تے اس نوں کو دیندے ائے میرا دادا وڈا بٹیر باز ایا اُناں اک بٹیرے دے بدلے کہوڑی ٹانگے دی آفر ہوئی ائی اک بٹیر دے بدلے چارسدے دے اک کان نے موٹر دی آفر کیتی ائی بَرّے میرے دادا نے اے آفراں ٹھکراں دتی ائیاں۔ بٹیرے نوں جس اُچ رکھا جاندا وے اُس نوں خلتہ، کہیا جاندا ایا۔ بٹیرے دی خوراک ، کنگنی ہوندے اے تاہم اناں نوں نکی نکی ٹڈی بی کہیا جاندا وے اک خاص مٹی اچ اس نوں کھوایا جاندا وے تے اس دا ڈر کڈنے وسے اس دے کن اُچ کوک بی دتی جاندی اے، میں بوت پہگیلے بٹیرے کھادے وُن۔
رشید احمد سہیل: بالکل سوکھا تے بغیر گوشت پوست دا بٹیر مہنگا وک دا ایا، تے موٹا تازہ بٹیر نوں کوئی پسند نی کردا ایا، تے بٹیر باز اکثر اس نوں ہتھ تے ورزش کرواندا ایا کہ موٹا نہ ہو جاوے تے معمولی خوراک دیندا ایا۔ دیسی کیہیو تے ڈرائی فروٹ دی چوری بی ہفتے اچ اک وار کھوانے ائے کہ لڑائی وسے تکڑا روے۔ اس دے خوبصورت تہاگیاں تے کچھکڑیاں نال بنیخل طے پنجرے زیادہ تر بنوں وال مشہور ہوندے ائے۔ ویسے تا پشور سی زیادہ بنوں لکی مورت اُچ بتیر بازی دے شوقین بوت ہوندے ائے، بَرّے لڑنے ولے بٹیرے خاص طور تے بنوں سی منگوائے جاندے ائے اناں علاقیاں دے بٹیرے بڑے لڑاکو تے قیمتی ہوندے وُن۔ اک بندہ ایا لاہوری اچ جیہڑا محمد زکریا پپو خان دے کول اس دا بوت اچھا باڈی گارڈ ایا اللہ بخشے اُس نوں ہونڑ اوہ فوت ہو چکا وے، اوہ بٹیرے نوں ہتھ دی تلی اچ بند کر کے اس دے سر تے چیخ ماردا ایا اَسی لوک اکثر اُس دی چیخ نوں انجوائے کرنے ایاں ساڈا کہار بی اسی محلے اچ ایا اوہ بی بہترین بٹیر باز ایا اے 1970 دی اک دردناک کہانڑی اے۔ پار نوشہرہ اچ ساڈے وڈے مامے دے کُش دوست ائے جناں دا ٹرکاں دا اڈا ایا تے بوت امیر لوک ائے تے اُناں دے فورڈ ٹرک بی ترے چار آپڑے ائے، اُس دا اک پُتر جیہڑا ہر وخت ٹرک دے نال کراچی آندا جاندا ایا تے بٹیر بازی دا بوت زیادہ شوقین ایا اکثر بٹیر گڈیاں اچ آپڑے نال رکھ دا ایا۔ جمعے ولے دن ہری چند میلے اچ بٹیر بازاں دی اکھٹ ہوندی ائی خریدوفروخت دے علاوہ شوقن مزاج شرطاں بی لگا لیندے ائے اک بٹیرا اُس نے بڑا مہنگا لتا ایا تے بوت مدت سی جنگ وسے تیار کردا رہیا۔ تے اک دن اُس جنگ اُچ چھوڑاتے ہار گیااُس زمانے اچ بوت سستوائی ہوندی ائی تے پورا خوبصورت نوں ٹرک ستر، اَسی ہزار دا مل دا ایا۔ اس نے دوسرا بٹیرا جنگ وسے کڈا تے بیس ہزار ہار گیا۔ وت تیسرا بٹیرا کڈا تے اوہ بی ہار گیا، آپڑے بٹیرے ختم ہوئے تے لوکاں دے بٹیریاں تے دائو لگانڑاں شروع کیتا تے نوں ٹرک ہار گیا۔ اس نے آپڑے بٹیرے نوں گولی مار دتی، تے غصے نال سارے بٹیرے مار دتے تے کہار پہنچڑیں سی پہلے کہار اُچ گل پہونچ چکی ائی کہ حیدر خان نے کہڑی، ٹرک تے پینتالیس ہزار نغد ہار چکا وے جدو کہار آیا تے پیو نال لڑا تے بار جا کے پیہرا نال بی لڑائی کیتی تے اُس نوں گولی مار دتی۔ پیہرا دے دوئے دن جنازہ ایا تے اے چودہ سال قید ہو گیا۔ کُش مدت دے بعد پیو بی دل دے دورے نال مر گیا تے جیل اُچ ٹی بی بیمارے نے حملہ کر دتا ، 7 سال قید رہیا تے جیل چو اُس دا جناہ نکلا اے میری یاداشت دی گل اے۔ اس دوران اس دی ماں بی اے غم نی برداشت کر سکی تے اس دے چِلے دے وچ ای ماں بی مر گئی۔ پروردگار سارے آں نوں جنت الفردوس اُچ جگہ دے وے آمین، ثم آمین۔ لالہ سکندر حیات صیب دی بٹیر بازاں اچ بوت دُکاناں ائیاں جناں اچ سارے پرندے وک دے ائے زیادہ تر کبوتر، طوطے، رنگ بہ رنگی طوطے، خرگوش، چڑیاں، بٹیرے تے نال پنجرے بی وک دے ائے تے کئی دُکاناں موتی کچکڑیاں دی بی اء یاں ہونڑ چاواں دی مارکیٹاں بنڑ گئیاں وُن۔ خان ڈایریز نے لکھا کہ شیش محل حمام کالی باڑی صدر اچ اناں دا باقاعدہ ٹورنامنٹ ہوندا ایا۔
نور محمد صاحب نے لکھا کہ پشور اُچ اک بزار دا نام ای بٹیربازاں دا ایا اگر چہ اُتھے بٹیریاں دے علاوہ تھوڑے بوت دوئے پرندے بی ہوندے ائے ۔ ہونڑ پرندے تے بٹیر کوہاٹی اچ وک دے وُن۔ پیپلز پارٹی دے اک ایم پی اے اسمبلی اچ بٹیرا لے کے آندا ایا تے اُناں نے اس شوق دی وجہ نال ویاہ بی نی کیتا ایا۔ (رشید احمد سہیل) سر جی اُردو اچ اس نوں کنگنی تے ہندکو اچ کنگڑی بول دے وُن اے باجرے دی طراں ہوندی اے بَرّے باجرے سی تھوڑی جئی پتلی ہوندی اے جی منے کمنٹ اُچ لکھا وے اناں سبز کیڑیاں نوں ہندکو اچ مکھنڑ کیہندے وُن۔
ریاض صدیقی صیب نے لکھا کہ شاعر مشرق محترم علامہ اقبال نے بی بٹیرے بڑے شوق نال رکھے وہئے ائے۔ پشور اپچ بوت حضرت لوک بی گزرے وُن
اک بوت ای مشہور فیملی خواجہ اچ اک حافظ کونک گزرے وُن جناں نے کونک اس طراں پالا ہویا ایا کہ جدو اوہ کہار سی ناشتہ کر کے آپڑے کاروبار وسے نکل دے ائے تے اکثر کونک نوں پنجرے سی بار کڈ دیندے ائے تے کونک حافظ جی صیب دے پیچھے آندا ہویا منزل مقصود تکل پہنچ جاندا۔ دوئی گل بٹیر باز اک ہتھ اُچ بٹیر پکڑ دا ایا تے دوئے ہتھ اُچ بٹیرے دی ٹنگاں نوں آپڑے ہتھ دی تلی تے مسلسل چھواندا رہندا ایا تے بزار اپچ خلتہ بغل اُچ دبا کے بے فکر چل دا جاندا ایا۔ دوست یار رستے اچ چھ چار قہوے بی پلا دیندے ائے اے قہوے تے عام چلدے ائے۔
محمد الیاس صیب: ہاں جی اک وخت ایا کہ ہر وڈے گراں اچ ہفتہ وار اکھاڑا ہوندا ایا اس اپچ بٹیر باز شرط لگا کے بٹیرے لڑاندے ائے پشور بزار بٹیر باز اناں اچ بٹیر دی ہفتہ وار منڈی لگ دی ائی دور دور سی شکاری پرندے لیا کے بٹیر دی خریدو فروخت ہوندی ائی مختلف علاقیاں دے مختلف قسم دے بٹیرے ہوندے ائے تے شوقین لوک بٹیر خرید کے وت لڑائی وسے تیار کر دے ائے شوقین لوک رنگ بہ رنگ دے پنجرے جس نوں خلتہ کہیا جاندا اسی منڈی بٹیر باز اناں اچ مل دے ائے ۔ اے خلتے غریب تریمتاں کہراں اچ بنڑاندے تے مرد حضرات اسی بزار اپچ پیہج دے ائے بس اتنا کُش یاد 1959-60 دی دہائی اچ اس سی پہلے خدا جانڑیں۔
عامر قیوم صیب نے بتایا کہ جی حضور توانے صحیح فرمایا وے، اک ہتھ اُچ بٹیرا پکڑے دوئے اچ خلتہ چُک کے بوت شوقین لوک پائے جاندے ائے پشور سی متصلہ علاقہ ” خالصہ ” اچ اس دے اکھاڑے سج دے ائے۔ اس دے علاوہ پشور ، شاہی باغ اُچ موجود افغان گرانڈ تے متصل باغات اُچ کالے تیتر دی آواز دا ٹورنامنٹ بی منعقد کیتا جاندا ایا۔
جمال ناصر صیب فرماندین عمر حیات لالہ جی بٹیرے تے اج بی ساڈے ہتھاں اچ تے اج اس بٹیرے دا نام موبائل اے۔
خواجہ صیب نے لکھا کہ منے نکے یاں ہوندیاں اک بٹیرا رکھا ایا اس نوں بدام ، پستہ بی کھوانا ایاں اوہ بوت مست ہو گیا اُچی اُچی آوازاں لگاندا تے خلتے اچ وڈیاں کُداں ماردا ایا گرمی اچ بان دی منجی تے سوندا تے خلتا اک میخ دے نال لٹکا دتا اس نے اتنیاں کُداں ماریاں کہ خلتا میخ سی نکل کے منجھے تے ٹہہ پیا سوندے اچ پہلو بدلا اکھی کھلی تے میخ تے خلتا نظر نہ آیا پریشانی اچ اُٹھا دیکھا تے بٹیرا میرے تلے آ کے مر گیا ایا ہونڑ کیہہ بتاواں کہ کتنا افسوس ہویا اک خاص گل عام طور تے ڈاکٹر دل دے مریضاں تے انڈے کھانڑیں سی پرہیز دا مشورہ دیندے وُن۔بَرّے میرا اک دوست کینیڈا اچ ڈاکٹر اے اوہ میرے نال ملنے آیا تے اناں دناں اچ منے کہار اُچ اک پنجرے اچ بٹیرے رکھے ہوئے ائے تے بٹیری نے کُش انڈے بی دتے ائے اُس نے انڈے دیکھ کے میرے سی پُچھا کہ جدید ریسرچ دے مطابق بٹیرے دے انڈے دل دی بیماریاں اچ بوت فیدہ مند اُن اے گُڈ کیلیسٹرول بنڑاندے وُن تے بیڈ کیلیسٹرول کہٹ کر دے وُن وت اس دے بعد جدو ست اٹھ انڈے جمع ہو جاندے میں کھا لیندا۔ چار بٹیریاں ایاں تے اُناں نے پچاس سی زیاد انڈے دتے وت اچانک اُناں تے بیماری آئی تے ساریاں مر گئیاں اجکل بڑے سوہنڑیں فارمی انڈے مل دے وُن جس اُچ ہلکے بدامی رنگ دے بالکل چِٹے کالے تے چِٹے ملے جلے رنگا اچ دستیاب اُچ پچاس روپے اچ اگر کہار دے اک کہونڑیں اچ ست اٹھ فٹ جگہ ہووے تے اک پنجرہ بنڑاں لے وُن تے دس بیٹریاں تے اک بٹیرا چھوڑ دے وو تے وت انڈے کھائو۔
بہادر علی نے لکھا کہ موقع ملے تے اس پتے تے آ جانڑا ساڈے گراں اچ ہونڑ بی بٹیر بازی ہوندی اے۔ ہمایون اخوند صیب نے لکھا کہ دیمک اس دی خوراک اے کاش ستر دی دہائی اچ پی ٹی وی اے چیزاں محفوظ کردا اس دے علاوہ زاہد نصیر صیب تے کئی دیگر دوستاں نے آپڑی یاداشت نوں تازہ کیتا۔ بٹیریاں نوں جال نال پکڑا جاندا وے ، بندوق نال شکار نی کیتا جاندا کیوں کہ اے چھریاں نال ریزہ ریزہ ہو جاندا وے ۔ جیہڑے لوک بٹیرے پالنے دے شوقین ہوندے وُن اُناں نوں بٹیر باز کہیا جاندا وے۔ اوہ اُناں دی لڑائی تے شکار تے وڈی وڈی شرطاں لگاندے وُن۔ مغلیہ دور حکومت دے زوال دے دناں اچ لکھنئو اچ بٹیر بازی دا عام رواج ایا۔ پاکستان اُچ پشور، اٹک تے ملتان دے ضلعیاں اچ کسی زمانے بٹیر بازی دے مراکز سمجھے جاندے وُن۔
خیبرپختونخوا میں ٹریفک قوانین کی خلاف ورزی پر ڈی میرٹ پوائنٹ سسٹم نافذ کرنے کا…
پشاور کے نوجوان نے ولیمے میں یتیم بچوں، بزرگوں اور خصوصی افراد کو مدعو کرکے…
پشاور سمیت خیبرپختونخوا میں 24 گھنٹے بعد سی این جی اسٹیشنز دوبارہ کھل گئے پشاور:…
چیئرمین پی سی بی محسن نقوی کا پشاور میں ٹرائی سیریز کروانے کا اعلان پاکستان…
پشاور میں گیس بحران شدت اختیار کرگیا، بچے بغیر ناشتے سکول جانے پر مجبور پشاور…
خیبرپختونخوا کے 14شہروں میں الیکٹرک بس سروس کا منصوبہ، پہلے مرحلے میں 6 شہر شامل…