سافٹ ڈرنکس اور مصنوعی مٹھاس والے شربت جگر کے لیے نقصان دہ، ماہرین کا انتباہ

جگر انسانی جسم کا سب سے پیچیدہ عضو ہے جو تقریباً 50 ہزار کیمیائی تعامل انجام دیتا ہے۔ ایک تازہ ترین تحقیق کے مطابق سافٹ ڈرنکس، سوڈا اور مصنوعی مٹھاس کے مشروبات جگر کو متاثر کرتے ہیں اور بالخصوص اس کی زہرربائی (ڈی ٹاکسفکیشن) کی صلاحیت پر اثر انداز ہوتے ہیں۔یعنی ان مشروبات سے جگر کی وہ صلاحیت متاثر ہوتی ہے جس سے وہ جسم سےزہریلے مرکبات نکال باہر کرتا ہے۔

یہ ریسرچ امریکہ کےوسکانسن میڈیکل کالج میں کی گئی ہےجس میں پہلی مرتبہ وہ پورا سالماتی اور کیمیائی عمل سامنے آیا ہےجس کے تحت سافٹ ڈرنکس اور مصنوعی مٹھاس والے مشروبات جگرپراثر ڈال کر اس کی زہریلے مرکبات کے اخراج کی صلاحیت کو متاثر کرتےہیں۔ریسرچ کے مطابق یہ مشروبات جگر میں پیدا ہونے والی ایک اہم ترین پروٹین پی گلائکوپروٹین (پی جی پی) کوغیر فعال بناتے ہیں۔جگر میں پیدا ہونے والی یہی پروٹین فاسد مادوں کو بدن سے باہر نکالنے میں معاون ہوتی ہے۔ حتیٰ کہ یہ پروٹین اینٹی بائیوٹکس ادویات کے مضرکیمیکلز کو بھی نکال باہر کرتی ہے۔

ماہرین کے مطابق مصنوعی مٹھاس کے اجزا پی جی پی سے چپک جاتے ہیں اور اس کی صلاحیت پراثرانداز ہوتے ہیں۔ یوں جگر ادویات کے کیمیائی اجزا، زینو بایوٹکس اور بائل تیزاب کو بھی باہر نہیں نکال پاتا۔ماہرین نے خبردار کیا ہے کہ مقررہ مقدار سے کم مٹھاس والے مشروبات بھی جگر کو یکساں طور پر متاثر کرسکتے ہیں۔ اگرچہ اس ضمن میں مزید تحقیق کی ضرورت ہے لیکن تحقیقی ٹیم نے لوگوں کو میٹھے مشروبات اور سافٹ ڈرنکس سے پہلےہی خبردار کرتے ہوئے ان کا استعمال کم سے کم کرنے کا مشورہ دیا ہے۔