خیبرپختونخوا ٹورازم اتھارٹی کے زیراہتمام طالبات اور فیملیز کا شنکیاری ٹی گارڈن کا تعلیمی و سیاحتی دورہ

خیبرپختونخوا ٹورازم اتھارٹی کے زیراہتمام طالبات اور فیملیز کا شنکیاری ٹی گارڈن کا تعلیمی و سیاحتی دورہ

پشاور: وزیراعلیٰ خیبرپختونخوا کے معاون خصوصی برائے سیاحت و ثقافت ملک عدیل اقبال کی ہدایات پر خیبرپختونخوا کلچر اینڈ ٹورازم اتھارٹی کے زیر اہتمام ایگری ٹورازم کے فروغ کے لیے شنکیاری ٹی گارڈن، ریسرچ سنٹر شنکیاری اور ہزارہ یونیورسٹی کے عجائب گھر کا ایک روزہ تعلیمی و سیاحتی دورہ منعقد کیا گیا۔

دورے میں مختلف تعلیمی اداروں کی طالبات، فیملیز اور سیاحت سے دلچسپی رکھنے والے افراد نے شرکت کی۔ شرکاء کو مانسہرہ کے شنکیاری ٹی گارڈن میں چائے کی کاشت، تحقیق، پراسیسنگ اور پیکنگ کے مختلف مراحل سے عملی طور پر آگاہ کیا گیا، جبکہ ماہرین نے پاکستان میں چائے کی مقامی پیداوار، اس کی معاشی اہمیت اور زرعی شعبے میں اس کے امکانات پر تفصیلی بریفنگ بھی دی۔

شرکاء نے ہزارہ یونیورسٹی کے عجائب گھر کا بھی دورہ کیا، جہاں انہیں خطہ ہزارہ کی قدیم تہذیب، ثقافتی ورثے، آثارِ قدیمہ اور تاریخی نوادرات سے متعارف کرایا گیا۔ بعد ازاں انہوں نے خوبصورت سیرن وادی کی قدرتی خوبصورتی سے لطف اندوز ہوتے ہوئے مقامی ثقافت اور روایتی طرز زندگی کا مشاہدہ بھی کیا۔

دورے کے دوران شرکاء نے پاکستان کے سب سے بڑے چائے کے باغات میں تیار ہونے والی مقامی چائے، قہوہ، شہد اور دیگر زرعی و دستکاری مصنوعات بھی خریدیں۔

شرکاء نے خیبرپختونخوا کلچر اینڈ ٹورازم اتھارٹی کے اس اقدام کو سراہتے ہوئے کہا کہ ایگری ٹورازم جیسے پروگرام نوجوان نسل کو زراعت، ماحول دوست سیاحت، قدرتی وسائل کے تحفظ اور مقامی ثقافت سے روشناس کرانے میں اہم کردار ادا کرتے ہیں۔ انہوں نے مستقبل میں بھی ایسے تعلیمی اور تفریحی دوروں کے انعقاد کی امید ظاہر کی۔