پی ٹی آئی احتجاج: پشاور کا دیگر شہروں سے رابطہ متاثر، موٹروے دوسرے روز بھی بند

پی ٹی آئی احتجاج: پشاور کا دیگر شہروں سے رابطہ متاثر، موٹروے دوسرے روز بھی بند

ویب ڈیسک: پشاور میں جاری احتجاج کے باعث موٹروے دوسرے روز بھی بند رہی جبکہ شہر میں داخل ہونے والی بیشتر مرکزی سڑکیں بھی متاثر ہونے سے ہزاروں مسافروں کو شدید مشکلات کا سامنا کرنا پڑ رہا ہے۔
پشاور میں احتجاج کے باعث اسلام آباد سے پشاور تک موٹروے مسلسل دوسرے روز بھی بند رہی، جس سے ٹریفک کا نظام بری طرح متاثر ہو گیا ہے، پشاور آنے والی تقریبا تمام بڑی شاہراہیں بھی مختلف مقامات پر بندش یا شدید دباو کا شکار ہیں، جس کے نتیجے میں شہر کا دیگر علاقوں سے زمینی رابطہ متاثر ہو کر رہ گیا ہے۔
موٹروے کی بندش کے باعث پشاور سے برہان تک سفر کرنے والے ہزاروں مسافر مشکلات میں پھنس گئے ایئرپورٹ جانے والے متعدد مسافر بروقت نہ پہنچ سکے جس کے باعث ان کی پروازیں چھوٹ گئیں، اسی طرح مریضوں کی منتقلی اور دیگر ہنگامی صورتحال سے نمٹنے میں بھی شدید دشواری کا سامنا کرنا پڑا، دوسری جانب جی ٹی روڈ پر ٹریفک کا غیر معمولی دباو دیکھنے میں آیا جہاں منٹوں کا سفر گھنٹوں میں طے ہونے لگا جبکہ مختلف مقامات پر رکاوٹوں اور رش کے باعث اسلام آباد، پشاور اور دیگر شہروں کے درمیان سفر کرنے والے افراد کو شدید پریشانی کا سامنا ہے۔
ٹریفک کی صورتحال خراب ہونے سے شادی بیاہ کی تقریبات بھی متاثر ہوئیں جبکہ مختلف شہروں سے آنے والی باراتیں اور دیگر تقاریب میں شرکت کرنے والے افراد بھی وقت پر نہ پہنچ سکے اس کے علاوہ میتوں کی منتقلی میں بھی تاخیر کی اطلاعات سامنے آئی ہیں جس پر شہریوں نے شدید تشویش کا اظہار کیا ہے۔

Publisher