پشاور: کرکٹ اسٹیڈیم پی سی بی کے حوالے کرنے پر غور، بین الاقوامی کرکٹ کی بحالی کی تیاریاں
پشاور: خیبر پختونخوا حکومت نے پشاور کے ارباب نیاز کرکٹ اسٹیڈیم کو پاکستان کرکٹ بورڈ (پی سی بی) کے تحویل میں دینے کے لیے سنجیدہ اقدامات شروع کر دیے ہیں، تاکہ صوبے میں بین الاقوامی کرکٹ کی باقاعدہ بحالی کی راہ ہموار کی جا سکے۔
ذرائع کے مطابق اس حوالے سے خیبر پختونخوا حکومت اور پی سی بی کے درمیان رابطے جاری ہیں، جبکہ باہمی شرائط کو حتمی شکل دینے کے لیے مذاکرات کے دو دور مکمل ہو چکے ہیں۔
ذرائع کا کہنا ہے کہ قانونی اور انتظامی شفافیت یقینی بنانے کے لیے حکومت قذافی اسٹیڈیم لاہور اور نیشنل اسٹیڈیم کراچی کے حوالے سے پی سی بی کے ساتھ طے شدہ معاہدوں کا بھی تفصیلی جائزہ لے رہی ہے، تاکہ اسی طرز پر مناسب ماڈل اختیار کیا جا سکے۔
خیبر پختونخوا کے مشیرِ کھیل تاج محمد ترند نے اس پیشرفت کی تصدیق کرتے ہوئے کہا کہ صوبائی حکومت کی اولین ترجیح خیبر پختونخوا میں بین الاقوامی کرکٹ کی بحالی اور عالمی مقابلوں کا انعقاد ہے۔
انہوں نے کہا کہ قذافی اور نیشنل اسٹیڈیم کے معاہدوں کا جائزہ لیا جا رہا ہے، تاہم ارباب نیاز کرکٹ اسٹیڈیم کو پی سی بی کے حوالے کرنے کا حتمی فیصلہ تمام قانونی، انتظامی اور مالی پہلوؤں کی مکمل جانچ پڑتال کے بعد کیا جائے گا۔
