انڈر 21 گیمز، پشاور ریجن 189 میڈلز کے ساتھ سرفہرست

انڈر 21 گیمز، پشاور ریجن 189 میڈلز کے ساتھ سرفہرست

پشاور: ڈائریکٹوریٹ جنرل آف سپورٹس خیبرپختونخوا کے زیراہتمام انڈر 21 گیمز کامیابی کے ساتھ اختتام پذیر ہو گئیں۔ میڈلز ٹیبل پر پشاور ریجن 189 میڈلز کے ساتھ پہلی پوزیشن پر رہا، جن میں 124 گولڈ، 43 سلور اور 22 براؤنز میڈلز شامل ہیں۔

ملاکنڈ ریجن نے 18 گولڈ، 31 سلور اور 48 براؤنز میڈلز کے ساتھ دوسری جبکہ مردان ریجن نے 14 گولڈ، 26 سلور اور 46 براؤنز میڈلز کے ساتھ تیسری پوزیشن حاصل کی۔ کوہاٹ ریجن کو بہترین فیئر پلے ٹرافی دی گئی۔

پوائنٹس ٹیبل کے مطابق ڈی آئی خان ریجن 14 گولڈ، 19 سلور اور 32 براؤنز میڈلز کے ساتھ چوتھے نمبر پر رہا۔ ہزارہ ریجن نے 13 گولڈ، 36 سلور اور 55 براؤنز میڈلز کے ساتھ پانچویں پوزیشن حاصل کی۔ بنوں ریجن 12 گولڈ، 27 سلور اور 45 براؤنز میڈلز کے ساتھ چھٹے جبکہ کوہاٹ ریجن 12 گولڈ، 24 سلور اور 41 براؤنز میڈلز کے ساتھ ساتویں نمبر پر رہا۔

مشیر کھیل و امور نوجوانان تاج محمد ترند نے فاتح کھلاڑیوں، ڈی جی سپورٹس تاشفین حیدر اور ڈائریکٹوریٹ جنرل آف سپورٹس کی ٹیم کو کامیاب ایونٹ کے انعقاد پر مبارک باد دی۔

انڈر 21 گیمز کا آغاز 4 فروری کو ہوا تھا، جس میں سات مختلف ریجنز سے پانچ ہزار سے زائد کھلاڑیوں نے شرکت کی۔ گیمز میں مردوں کے 38 اور خواتین کے 18 مقابلے منعقد ہوئے، جبکہ سٹینڈنگ کرکٹ، زورخانہ، پست قامت اور خصوصی افراد کے مقابلے بھی شامل تھے۔