پشاور: مہمند آباد فائرنگ واقعہ، ایک شخص جاں بحق، تین زخمی، ملزمان گرفتار

پشاور: مہمند آباد فائرنگ واقعہ، ایک شخص جاں بحق، تین زخمی، ملزمان گرفتار

پشاور کے تھانہ شاہ پور کی حدود مہمند آباد میں مستورات کے تنازعے پر فائرنگ کا واقعہ پیش آیا، جس کے نتیجے میں ایک شخص جاں بحق جبکہ تین افراد زخمی ہو گئے۔ واقعے کی ویڈیو سوشل میڈیا پر وائرل ہو گئی ہے۔

پولیس کے مطابق دو فریقین کے درمیان فائرنگ کے دوران فریق اول کا سلمان خان ولد سید محمد، سکنہ مہمند آباد موقع پر جاں بحق ہو گیا۔ فریق دوم کے زخمیوں میں سراج اور ضیاءالرحمن پسران عبداللہ شامل ہیں، جبکہ ایک راہ گیر سلمان ولد زمان خان بھی زخمی ہوا۔

اطلاع ملتے ہی ایس پی رورل ڈویژن حامد احسان وڑائچ اور مقامی پولیس فوری طور پر موقع پر پہنچ گئی۔ جاں بحق شخص کی لاش پوسٹ مارٹم کے لیے جبکہ زخمیوں کو علاج کے لیے اسپتال منتقل کر دیا گیا۔

پولیس نے کارروائی کرتے ہوئے ملوث ملزمان سراج اور ضیاءالرحمن کو گرفتار کر لیا ہے۔ جائے وقوعہ سے شواہد اکٹھے کر لیے گئے ہیں اور واقعے کی مزید تفتیش جاری ہے۔ ملزمان کے خلاف قانون کے مطابق کارروائی کی جا رہی ہے۔