پشاور لیڈی ریڈنگ ہسپتال میں پیچیدہ امراض قلب میں مبتلا 40 بچوں کا مفت آپریشن

پشاور لیڈی ریڈنگ ہسپتال میں پیچیدہ امراض قلب میں مبتلا 40 بچوں کا مفت آپریشن

پشاورلائیو- لیڈی ریڈنگ ہسپتال میں برطانیہ اور ترکی کے ماہرینِ قلب کی ایک ٹیم نے پیچیدہ امراض قلب میں مبتلا 40 غریب بچوں کے مفت آپریشنز کیے۔ یہ مہم ایک برطانوی فلاحی ادارے کے تعاون سے منعقد کی گئی تھی۔

تفصیلات دنیا نیوز کے مطابق 15 رکنی بین الاقوامی طبی ٹیم نے خصوصی طور پر پاکستان اور بنگلادیش کا انتخاب کیا تھا۔ ٹیم نے دل میں سوراخ سمیت دیگر پیچیدہ عارضوں کا کامیابی سے علاج کیا۔ ہسپتال انتظامیہ کے مطابق صوبے بھر سے 60 مستحق بچوں کا انتخاب کیا گیا تھا، جن میں سے 40 کے آپریشنز مکمل ہو چکے ہیں۔

طبی ماہرین نے بتایا کہ تمام آپریشنز کامیاب رہے اور بچوں کی صحت میں خاطر خواہ بہتری آئی ہے۔ انہوں نے پاکستان میں اپنے قیام کو خوشگوار اور ہسپتال کے سہولیات کو تسلی بخش قرار دیا۔

یہ مہم خاص طور پر ان غریب خاندانوں کے لیے ایک رحمت ثابت ہوئی ہے جو مہنگے علاج کے اخراجات برداشت نہیں کر سکتے تھے۔ ہسپتال انتظامیہ نے مستقبل میں بھی ایسی انسان دوست مہمات جاری رکھنے کا عزم ظاہر کیا ہے۔