نوجوانوں کیلئے کھانے پکانے کے مقابلے،گرینڈفینالے کل منعقد ہوگا

پشاور:18مارچ2021(پ ر) محکمہ سیاحت، ثقافت، کھیل، آثارقدیمہ، میوزیم و امور نوجوانان خیبرپختونخوا کے زیرانتظام پشاور میں نوجوانوں کیلئے کھانے پکانے کے مقابلے جاری ہے۔تیسرے روز ٹاپ پانچ شرکاء کا انتخاب کیاگیا جن کے مابین کل حتمی مقابلے منعقد ہونگے۔ایونٹ میں ایس او پیز پر سختی سے عملدرآمدکرتے ہوئے ماسک کی پابندی اورسماجی فاصلے کا خصوصی خیال رکھا جا رہا ہے۔

یہ بھی پڑھیں : محکمہ سیاحت کے زیرانتظام نوجوانوں کیلئے کھانے پکانے کے مقابلے کا انعقاد

محکمہ امورنوجوانان خیبرپختونخوا کے زیراہتمام پشاور سروس کلب میں منعقدہ چارروزہ کوکنگ مقابلوں میں صوبہ بھر سے ستر سے زائد نوجوانان مردوخواتین نے حصہ لیا۔جس میں ایونٹ کے تیسرے روز ٹاپ پانچ مردوخواتین نوجوانوں کا انتخاب کیا گیا ان مقابلوں میں پشاور، ڈسٹرکٹ اورکزئی، سوات،ملاکنڈ، چترال، ایبٹ آباد، بٹگرام، ڈسٹرکٹ خیبر، مردان، کوہاٹ، چارسدہ سمیت دیگر ڈسٹرکٹ سے مردوخواتین نے شرکت کی۔ان مقابلوں میں اسسٹنٹ ہوم اکنامکس کالج پشاور یونیورسٹی پروفیسر ڈاکٹرظہیر انجم،پروفیشنل شیف ٹرینر منیبہ عثمان اور سروس کلب کے ایگزیکٹیو شیف ویلیم اصغرنے ججز کے فرائض انجام دیئے۔ واضح رہے 16مارچ سے 19 مارچ تک منعقد ہونے والے ایونٹ کے پہلے دو روز نوجوانوں سے آڈیشن لئے گئے جس کے بعد ٹاپ 20 شرکاء کے مابین مقابلے کئے گئے جس میں پہلے پانچ شرکاء کا چناؤ عمل میں لایا گیا۔مقابلوں میں شریک نوجوانوں کی حوصلہ افزائی کیلئے ان میں سرٹیفیکیٹ اور جیتنے والے نوجوانوں میں نقد انعامات تقسیم کئے جائینگے۔محکمہ امورنوجوانان خیبرپختونخوا کے زیراہتمام کھانے پکانے کے مقابلوں میں 14 تا 29 سال کی عمر کے نوجوانوں نے آن لائن اپنی شرکت کی ہے جن کے مابین ٹیم اور انفرادی طور پر کھانے پکانے کے مقابلے ہوئے۔مقابلوں میں ہر ٹیم ایک شیف اور ایک مدد گار(ہیلپر) پر مشتمل تھی۔