پاکستان سمیت دیگر ممالک کے شہریوں کو 15ربیع الاول سے عمرہ کی اجازت دینے کا فیصلہ

جدہ۔ سعودی عرب کی جانب سے پاکستان سمیت دیگر ممالک کے شہریوں کو 15ربیع الاول سے عمرہ ادا کرنے کی اجازت دینے کا فیصلہ کرلیا گیا، زائرین کیلئے انسداد کورونا ایس او پیز پر عمل درآمد کرنا لازم ہوگا۔

 سعودی وزارت حج و عمرہ نے زائرین کے لیے عمرہ کے ایس او پیز جاری کردیے ہیں، جبکہ 4 اکتوبر سے مقامی شہریوں کیلئے عمرہ ادائیگی کے پہلے مرحلے کا آغاز ہوگا، اور اس کے بعد پاکستان سمیت دیگر ممالک کے افراد کو 15ربیع الاول سے عمرہ کی اجازت دینے کا فیصلہ ہوا ہے، تاہم زائرین کو عمرہ ادائیگی سے پہلے ہی اجازت نامہ لینا لازمی قرار دیا ہے۔

 زائرین عمرہ سے قبل موبائل ایپ ’اعتمرنا‘ کے ذریعے بکنگ کروائیں گے، اور موبائل ایپ سے بکنگ کا آغاز آج سے ہی شروع ہوچکا ہے۔

وزارت حج و عمرہ کی جانب سے عمرہ زائرین کیلئے 3 گھنٹے کا وقت مختص کیا گیا ہے، جس میں 7بار طواف، 2رکت سنت،سعی صفا ومروہ اور حجامت کے فرائض ادا کرنا جبکہ پہلے مرحلے میں 6 زائرین روزانہ عمرہ کی ادائیگی کرسکیں گے، زائرین کو خاص بسوں کے ذریعے سے مسجد الحرام لایا جائے گا۔

 واضح رہے کہ زائرین اور نماز کے لیے مسجد الحرام میں خاص اہتمام کیا جا رہا ہے، اسی مقصد کے لیے مسجد الحرام میں ایڈوانسڈ تھرمل کیمرے نصب کرا دیے ہیں۔

 جدید ترین ٹیکنالوجی والے یہ تھرمل کیمرے الارم سے آراستہ ہیں، جب کوئی ایسا زائر ان کیمرے سامنے سے گزرے گا جس کے جسم کا درجہ حرارت نارمل سے زیادہ ہوگا تو ان تھرمل کیمروں پر لگے الارم وارننگ جاری کرنا شروع کر دیں گے۔