گداگری میں ڈی پورٹ شخص دوبارہ سعودیہ جانے کی کوشش میں گرفتار، ایجنٹ نے کیا مشورہ دیا؟

گداگری : سعودی عرب سے بے دخل شہری دوبارہ جدہ جاتے ہوئے گرفتار

کراچی: امیگریشن حکام نے سعودی عرب میں گداگری کے الزام میں بے دخل کیے گئے شہری کو ورک ویزے پر دوبارہ جدہ جانے کی کوشش کرتے ہوئے کراچی ایئرپورٹ پر گرفتار کر لیا۔

ملزم الہاندو پنہور غیر ملکی ایئر لائن کی پرواز سے جدہ روانہ ہونے والا تھا، تاہم امیگریشن چیک کے دوران اس کا نام بلیک لسٹ کیٹیگری میں شامل پایا گیا۔ حکام کے مطابق، وہ 2019 میں عمرہ ویزے پر سعودی عرب گیا تھا جہاں گداگری کے الزام میں گرفتار ہوا تھا۔

الہاندو پنہور کو سعودی پولیس نے جیل بھیج دیا تھا اور جون 2023 میں پاکستان ڈی پورٹ کر دیا گیا تھا۔ گداگری میں ملوث ہونے کی وجہ سے اس کا نام بلیک لسٹ میں شامل کر دیا گیا تھا۔

مسافر نے دوران تفتیش انکشاف کیا کہ اس نے 2 لاکھ 40 ہزار روپے میں ورک ویزہ اور ٹکٹ ایک ایجنٹ عبدالشکور سے خریدا تھا، جس نے اسے سعودی عرب پہنچنے کے بعد بھیک مانگنے کا مشورہ دیا تھا۔

ملزم کو مزید کارروائی کے لیے انسداد انسانی اسمگلنگ سرکل کراچی کے حوالے کر دیا گیا ہے۔