پشاور میں بجلی چوری کے خلاف کریک ڈاؤن، متعدد غیر قانونی کنڈا کنکشنز منقطع

پشاور میں بجلی چوری کے خلاف کریک ڈاؤن، متعدد غیر قانونی کنڈا کنکشنز منقطع

پشاور: چیف ایگزیکٹو آفیسر پیسکو کی ہدایات پر بجلی چوری کے خلاف جاری مہم کے تحت پشاور کے مختلف علاقوں میں کارروائی کرتے ہوئے متعدد غیر قانونی کنڈا کنکشنز منقطع کر دیے گئے۔

پیسکو حکام کے مطابق سپرنٹنڈنگ انجینئر پشاور سرکل محمد فاروق ارباب اور ایکسین سٹی امین اللہ خان کی نگرانی میں ایس ڈی او ڈبگری اعجاز، لائن سپرنٹنڈنٹ کرامت اللہ خان اور سب ڈویژنل سٹاف نے پولیس کی موجودگی میں ڈاگہ، حسن خیل اور ستار شاہ کے علاقوں میں بجلی چوری کے خلاف کارروائی کی۔

کریک ڈاؤن کے دوران مختلف مقامات کا معائنہ کیا گیا اور غیر قانونی طریقے سے بجلی استعمال کرنے والے کنڈا کنکشنز کی نشاندہی کر کے موقع پر ہی منقطع کر دیا گیا۔

پیسکو حکام کا کہنا ہے کہ بجلی چوری کے خاتمے اور لائن لاسز میں کمی کے لیے ایسی کارروائیاں مستقبل میں بھی جاری رہیں گی تاکہ صارفین کو بہتر سہولیات فراہم کی جا سکیں۔

حکام کے مطابق مذکورہ علاقوں میں غیر قانونی کنڈا کلچر اور بوسیدہ کیبلز کے باعث ٹرانسفارمرز بار بار خراب ہونے کے واقعات رونما ہوتے رہے ہیں، جس سے نہ صرف بجلی کی ترسیل متاثر ہوتی ہے بلکہ لائن لاسز میں بھی اضافہ ہوتا ہے۔

پیسکو کا کہنا ہے کہ بجلی کے بل باقاعدگی سے ادا کرنے والے صارفین بھی ان غیر قانونی اقدامات سے متاثر ہوتے ہیں۔ گزشتہ روز بعض افراد نے ٹرانسفارمر کی خرابی کے معاملے پر متعلقہ دفتر کا گھیراؤ کیا تھا، تاہم حکام کے مطابق مسئلے کی بنیادی وجہ غیر قانونی کنڈا کنکشنز اور اوور لوڈنگ ہے، جس کے تدارک کے لیے کارروائیاں جاری ہیں۔