خیبرپختونخوا کلچراینڈٹورازم کے زیراہتمام اورکزئی فیسٹیول کا آغاز

پشاور: 19مارچ 2022(پ ر) خیبرپختونخوا کلچراینڈٹورازم اتھارٹی، ضلعی انتظامیہ،سپورٹس ڈیپارٹمنٹ اور اورکزئی سکاؤٹس کے باہمی اشتراک سے منعقدہ پہلا اورکزئی فیسٹیول کا آغاز ہو گیا۔ فیسٹیول کا افتتاح ڈپٹی کمشنر اورکزئی محمد آصف رحیم اور کمانڈنٹ اورکزئی سکاؤٹس رائے کاشف آمین نے کیا۔

ان کے ہمراہ ڈائریکٹر خیبرپختونخوا کلچر اینڈٹورازم اتھارٹی یوسف علی، پراجیکٹ ڈائریکٹر ٹورازم ونگ ضم اضلاع اشتیاق خان، ڈسٹرکٹ سپورٹس آفیسر اورکزئی محمد حسین، علاقہ مشران سمیت دیگر اہم شخصیات موجود تھیں۔

تاریخ میں پہلی مرتبہ صوبہ میں شامل ضم اضلاع ڈسٹرکٹ اورکزئی میں کلایہ کے مقام پر منعقد ہونے والے پہلے اورکزئی فیسٹیول میں روایتی کھیلوں سمیت والی بال، کبڈی، آرچری، رسہ کشی، جمناسٹک اور پیراگلائیڈنگ کے مقابلے منعقد کئے گئے ہیں۔ فیسٹیول میں روایتی کھانوں، ہینڈی کرافٹ سٹالز، فائن آرٹس، ریسکیو 1122 سٹال، روایتی حجرہ، بچوں کی ٹیبلو پرفارمنس، روایتی رباب موسیقی سمیت دیگر سرگرمیاں شامل ہیں۔

تقریب سے خطاب کرتے ہوئے ڈائریکٹر خیبرپختونخوا کلچراینڈٹورازم اتھارٹی یوسف علی کا کہنا تھا کہ خیبرپختونخوا کلچر اینڈٹورازم اتھارٹی صوبے میں موجودہ سیاحتی مقامات کیساتھ ساتھ نئے سیاحتی مقامات کو فروغ دینے کیلئے بھی اقدامات اٹھا رہا ہے۔ ضم اضلاع میں اورکزئی ڈسٹرکٹ صوبے کے حسین اور قدرتی سیاحتی مقامات میں سے ایک ہے اور صوبائی حکومت کی ہدایات کے مطابق ضم اضلاع میں بھی کیمپنگ پاڈرز، سیاحوں کیلئے آرام گاہیں، رابطہ سٹرکیں اور دیگر سہولیات فراہم کررہے ہیں۔

پراجیکٹ ڈائریکٹر اشتیاق خان اور ڈپٹی کمشنر کلایہ اورکزئی محمد آصف رحیم کا کہنا تھا کہ اورکزئی میں سیاحتی مقامات کا تعین کر لیا گیا ہے اوران سیاحتی مقامات پر نئے پراجیکٹس لے کرآرہے ہیں۔

اورکزئی فیسٹیول آخری فیسٹیول نہیں بلکہ یہ ابتداء ہے ہماری سیکورٹی فورسز اور مقامی لوگوں کی قربانیوں کی بدولت یہاں امن قائم ہوا ہے اور اب یہاں کا مثبت چہرہ دنیا کو پیش کرنے کا موقع ہے۔فیسٹیول میں مقامی افراد اور نوجوانوں کی دلچسپی خو ش آئند ہے۔