پشوری قہوہ پشور دی جان اے

تحریر: عمر حیات (ہندکو)

پشور نہ صرف پاکستان بلکہ پوری دنیا چ تاریخی اھمیت دا حامل اے ۔ اگر ساڈے صوبے دا دل پشور اے تا قہوہ پشور دی جان اے ۔ پشوری قہوے سی دنیا واقف اے ۔ قدیم کہرانیاں چ ھونڑ بی ھر ویلے چلہے تے پانڑیں جوشانڑے رکھا رہندے اودھر کوئی مزمان کہارآ کے وڑا تے ادھر قہوے نو دم دتا ۔

پشور دے گلیاں کوچے تے بزاراں چ قہوے خانیاں دی موجودگی اس دی مقبولیت ظاھر کردے ون ۔ قہوہ دے سلسلے چ مزماناں دی کوئی تخصیص بی نینگی ھر جانڑ پچھانڑ تے روز دا ملاقاتی بی اگر آ جاوے تا اس دی تواضع قہوے نل ای کیتی جاندی اے ۔ تقریبن صدی پہلے قہوہ چین سی پشور پونچا ایا ۔ فیرکابل تے قندھار تک پھیل گیا ۔پشور چ قہوے دی وجہ شہرت اے بھی وے کہ ثمرقند و بخارا تے ترکستان دے بوت سارے خاندان ھجرت کر کے اتھے آئے تے قہوے دی سوغات آپڑے نال لیا کے اتھے متعارف کروائی ۔

قہوے دا مزا اس دے رنگ تے خوشبو دا محتاج اے ۔ قہوہ تیار کرنے دے ترے اصول لطافت خشکی تےصفائی ون ۔ قہوے دے برتن صرف قہوے وسے ای استعمال کیتے جاندے ون ۔ انہاں چ اگر ددھ وغیرہ ابال لتا جاوے تا قہوے وسے بیکار ھو جاندے ون ۔ اسدی نازک خوشبو کسی قسم دی کثافت نی برداشت کر سکدی ۔ ازے وسے عمدہ سبز پتی ۔ صاف ستھری کیتلی یا سماوار ۔ چھوٹی پیالیاں ۔ تے قہوے دی چینک ضروری اے۔

کھانڑے تو بعد اے نہایت ضروری سمجھا جاندا وے ۔ اکثر پشوری قہوے خانے والے نوں آرڈر دیندے وخت کہندے ون کہ جز بروبر رکھیں ۔ مطلب اے کہ صرف پانڑی چ پتی نہ پا دیویں بلکہ سبز لاچی جڑی قہوے دا جز شمار ھوندی اے بی شامل کریں ۔ پشوری قہوے چ سبز لاچی تے نارمل مٹھا پسند کردے ون ۔ کشمیری دار چینی تے موٹی لاچی شامل کردین تے کابلی تلخ قہوہ پیندے ون ۔

کسی وخت ویاواں شادیاں چ بی کھانڑے تو بعد قہوہ ضرور پیش کیتا جاندا ایا اکثر قہوہ چ دیر ھو جانڑے تے شرارتی لوک اوچی آواز چ گاندے ائے کہ ۔ قہوہ پلا دو ھمیں اک بار تھوڑا سا ۔ یا فیر اے کہ ۔ قہوہ پلا دو لاچیاں والا قہوہ ۔ وغیرہ وغیرہ ۔
چینی لکھاری لین یو تانگ کہندا وے کہ قہوے دا مزا فراغت اطمنان تے دوستی دی فضا چ آندا وے ۔