میڈیکل ٹیسٹ میں نقل اور پرچہ آؤٹ کرنے میں ملوث ملزم گرفتار

پشاور (اُردو پوائنٹ اخبارتازہ ترین – اے پی پی۔ 19 ستمبر2023ء) پشاور پولیس نے ایم ڈی کیٹ ٹیسٹ میں بلیوٹوتھ کے ذریعے نقل اور پرچہ آؤٹ کرنے میں ملوث مبینہ ملزم کو گرفتار کرلیا۔پولیس ذرائع کے مطابق ایم ڈی کیٹ ٹیسٹ میں بلیوٹوتھ کے ذریعے نقل اور پرچہ آؤٹ کرنے میں ملوث ملزم مبینہ طور پر ایم ڈی کیٹ ٹیسٹ سکینڈل میں ملوث گروہ کا کارندہ ہے۔

پولیس کا کہنا ہےکہ ملزم کو پشاور کے علاقے فقیر آباد سے حراست میں لیا گیا، اس کی عمر 30 سال ہے اور ملزم پہلے بھی اس قسم کی وارداتوں میں ملوث رہا ہے۔پولیس کا کہنا ہےکہ ملزم امتحانی ہال میں پرچہ آؤٹ کرنے والے لوگوں سے رابطہ میں تھا، ملزم سے مزید تفتیش جاری ہے۔دریں اثنا جوائنٹ انوسٹی گیشن ٹیم نے ایم ڈی کیٹ ٹیسٹ کےمعاملے پرایٹا کےدفتر کا دورہ کیا ایٹاحکام کی بنوں اور ڈی آئی خان کےملوث امیدواروں کےخلاف ایف آئی آرز درج نہ کرنےکی شکایت کی ایٹا حکام نے جے آئی ٹی کو ٹیسٹ کےطریقہ کار اور ایس او پیز سےمتعلق آگاہ کیا،جے آئی ٹی کو پرچوں کی تیاری، ترسیل اور نتائج سے بھی بریفننگ دی گئی ۔