پشاور کے تھانہ پہاڑی پورہ کی پولیس نے رکشہ میں رہ جانے والا ساڑھے 15 تولے سونا برآمد کر کے اصل مالک کے حوالے کر دیا۔
پشاور۔ 10 اپریل (اے پی پی):پشاور کے تھانہ پہاڑی پورہ کی پولیس نے رکشہ میں رہ جانے والا ساڑھے 15 تولے سونا برآمد کر کے اصل مالک کے حوالے کر دیا۔ سٹی پولیس پشاور کےتر جمان کے مطابق پنجاب سرگودھا کے رہائشی عبد اللہ نے دو روز قبل تھانہ پہاڑی پورہ پولیس کو رپورٹ کی کہ وہ اندرون شہر سے رکشہ میں سوار ہو کر جنرل بس سٹینڈ حاجی کیمپ جا رہا تھا۔ اترنے وقت ساڑھے 15 تولے سونا جس کی مالیت 81 لاکھ 63 ہزار روپے بنتی ہے، غلطی سے رکشہ میں رہ گیا اور رکشہ ڈرائیور اسے لے کر چلا گیا۔عبد اللہ کی رپورٹ پر پولیس نے فوری ایکشن لیا سی سی ٹی وی فوٹیجز اور دیگر ذرائع کی مدد سے ٹیکنیکل بنیادوں پر دن رات محنت کر کے رکشہ کا سراغ لگا لیا اور گمشدہ سونا برآمد کر کے اصل مالک کو واپس کر دیا۔سونا کے مالک عبد اللہ نے پولیس پشاور کا شکریہ ادا کیاہے۔