پشاور میں ترقی کا نیا دور، وزیراعلیٰ کا بڑی سرمایہ کاری کا اعلان

پشاور میں ترقی کا نیا دور، وزیراعلیٰ کا بڑی سرمایہ کاری کا اعلان

پشاور: دلہ زاک روڈ انڈر پاس کا افتتاح، وزیراعلیٰ کا وفاق پر فنڈز کی عدم فراہمی کا الزام

پشاور: دلہ زاک روڈ انڈر پاس کی افتتاحی تقریب سے خطاب کرتے ہوئے وزیراعلیٰ خیبرپختونخوا سہیل آفریدی نے کہا کہ صوبے میں ترقیاتی منصوبوں کا آغاز بانی چیئرمین کے وژن کے مطابق کیا جا رہا ہے اور آئندہ 60 روز میں عوام واضح تبدیلی محسوس کریں گے۔

انہوں نے کہا کہ پشاور کی ترقی اور بحالی کے لیے 100 ارب روپے جاری کیے گئے ہیں جبکہ آج 200 ارب روپے مالیت کے مختلف ترقیاتی منصوبوں کا افتتاح کیا جا رہا ہے۔ ان کا کہنا تھا کہ دہشت گردی کے خلاف جنگ میں خیبرپختونخوا کے عوام نے بے مثال قربانیاں دی ہیں اور لاکھوں افراد بے گھر ہوئے۔

وزیراعلیٰ نے وفاقی حکومت پر تنقید کرتے ہوئے الزام عائد کیا کہ خیبرپختونخوا کے ساتھ سوتیلی ماں جیسا سلوک کیا جا رہا ہے۔ انہوں نے دعویٰ کیا کہ وفاق صوبے اور ضم شدہ اضلاع کو این ایف سی میں ان کا جائز حصہ نہیں دے رہا اور خیبرپختونخوا کے 4 ہزار 758 ارب روپے واجب الادا ہیں۔

سہیل آفریدی کے مطابق وفاقی حکومت نے صوبائی منصوبوں کے لیے مختص فنڈز بھی جاری نہیں کیے جبکہ جنرل بس اسٹینڈ اور سوات ڈیم سمیت متعدد منصوبوں کے لیے این او سی بھی فراہم نہیں کیے جا رہے۔

انہوں نے کہا کہ صوبے کے عوام چاہتے ہیں کہ آئندہ بجٹ پر بانی چیئرمین سے مشاورت کی جائے۔ وزیراعلیٰ نے خبردار کیا کہ اگر 9 جون تک انہیں اور وزیر خزانہ کو بانی چیئرمین سے ملاقات کی اجازت نہ ملی تو 10 جون کو قومی اسمبلی کے سامنے احتجاجی دھرنا دیا جائے گا۔

وزیراعلیٰ نے اعلان کیا کہ مانسہرہ میں سیاحت کے فروغ کے لیے 50 ارب روپے مختص کیے گئے ہیں جبکہ نوجوانوں کے لیے یوتھ اور انٹرنشپ پروگرام متعارف کرائے جائیں گے۔ انہوں نے کہا کہ اقلیتوں اور معذور افراد کو بلا سود قرضے فراہم کیے جائیں گے جبکہ صحت اور تعلیم کے شعبوں میں نئے منصوبے شروع کیے جائیں گے۔

اپنے خطاب کے اختتام پر وزیراعلیٰ نے کہا کہ ان کے پاس مزاحمت کے علاوہ کوئی راستہ نہیں بچا اور تمام پاکستانیوں کو اس کے لیے تیار رہنا چاہیے۔