پشاور میں زمونگ کور کے بچوں کے لیے تھری ڈی انیمیٹڈ فلم کا شاندار انعقاد

پشاور میں زمونگ کور کے بچوں کے لیے تھری ڈی انیمیٹڈ فلم کا شاندار انعقاد

پشاور (محمد سعد) محکمہ سیاحت، ثقافت، آثارِ قدیمہ و عجائب گھر خیبرپختونخوا کے زیرِ اہتمام اور خیبرپختونخوا کلچر اینڈ ٹورازم اتھارٹی، تھرڈ ورلڈ اسٹوڈیو اور سلمان بیکرز کے اشتراک سے نشتر ہال پشاور میں تھری ڈی انیمیٹڈ فلم “اللہ یار اینڈ دی لیجنڈ آف مارخور” کی خصوصی نمائش کا انعقاد کیا گیا۔

یہ تقریب وزیرِ سیاحت فضل شکور خان کی خصوصی ہدایات پر منعقد کی گئی جس میں زمونگ کور کے 400 یتیم و بے سہارا بچوں نے شرکت کی۔ بچوں کے لیے فلم کے ساتھ ساتھ میجک شو، فیس پینٹنگ، جمپنگ ایریا، پلے زون اور کارٹون کریٹرز کا بھی انتظام کیا گیا تھا۔

تقریب میں ڈائریکٹر ایڈمن اینڈ فنانس خیبرپختونخوا کلچر اینڈ ٹورازم اتھارٹی عمر ارشد خان، ڈپٹی ڈائریکٹر کلچر صنم بشیر، ڈپٹی ڈائریکٹر مانیٹرنگ اینڈ ویجیلنس وسیم اقبال، اور تھرڈ ورلڈ اسٹوڈیو کے نمائندے وحید اور روحان خان سمیت دیگر شخصیات شریک تھیں۔

ڈائریکٹر عمر ارشد خان نے اپنے خطاب میں کہا کہ اس فلم کا مقصد یتیم و بے سہارا بچوں کو تفریح کے ساتھ تعلیمی اور ثقافتی آگاہی فراہم کرنا ہے۔ فلم میں خیبرپختونخوا کے سیاحتی مقامات، وائلڈ لائف، قومی پرندے و جانور، اور انسانی ہمدردی جیسے موضوعات کو اجاگر کیا گیا ہے۔

انہوں نے مزید کہا کہ خیبرپختونخوا کلچر اینڈ ٹورازم اتھارٹی آئندہ بھی اس طرح کی سرگرمیوں کا اہتمام کرے گی تاکہ صوبے میں ثقافت و سیاحت کے فروغ کے ساتھ بچوں کو مثبت تفریحی مواقع فراہم کیے جا سکیں۔