مستقبل کی میراث کی تشکیل: پاکستان بزنس سمٹ کا آغاز جمعرات کو پشاور میں ہوگا

مستقبل کی میراث کی تشکیل: پاکستان بزنس سمٹ کا آغاز جمعرات کو پشاور میں ہوگا

پشاور، 30 ستمبر 2025ء — تاریخی شہر پشاور پہلی مرتبہ ایک بڑے قومی کاروباری اجتماع کی میزبانی کرنے جا رہا ہے۔ پاکستان بزنس سمٹ جمعرات، 2 اکتوبر کو سرینہ ہوٹل پشاور میں منعقد ہوگا۔ یہ اہم تقریب گورنر خیبر پختونخوا کی سرپرستی میں نٹ شیل گروپ اور البراکہ بینک (پاکستان) لمیٹڈ کے اشتراک سے منعقد کی جا رہی ہے، جبکہ اوورسیز انویسٹرز چیمبر آف کامرس اینڈ انڈسٹری (او آئی سی سی آئی) اس کا اسٹریٹجک پارٹنر ہے۔

سمٹ کا مرکزی موضوع “آگے کیا ہے کی تشکیل” رکھا گیا ہے، جس کے تحت ملک کے اہم پالیسی ساز، صنعت و تجارت کے رہنما اور عالمی ماہرین پاکستان کی معیشت، جدت طرازی اور عالمی مسابقت پر تبادلۂ خیال کریں گے۔

افتتاحی اجلاس سے چیئرمین سینیٹ سید یوسف رضا گیلانی، گورنر خیبر پختونخوا فیصل کریم کنڈی، وفاقی وزیر خزانہ سینیٹر محمد اورنگزیب، وفاقی وزیر برائے ماحولیاتی تبدیلی سینیٹر ڈاکٹر مصدق ملک، وفاقی وزیر نجکاری محمد علی اور صوبائی وزیر خزانہ مزمل اسلم خطاب کریں گے۔ اس موقع پر وفاقی سیکریٹری آئی ٹی ضرار حشام خان، گروپ سی ای او کان ترزی اوغلو، سی ای او البراکہ بینک محمد عاطف حنیف اور نٹ شیل گروپ کے بانی و چیئرمین محمد اظفر احسن بھی شریک ہوں گے۔

اختتامی خطاب پاک فضائیہ کے سابق سربراہ اور نٹ شیل گروپ کے چیف ایگزیکٹو اسٹریٹجک انگیجمنٹس ایئر چیف مارشل (ر) سہیل امان کریں گے۔

سمٹ کے دوران بینکاری، صنعت، موسمیاتی تبدیلی، ٹیکنالوجی اور مصنوعی ذہانت کے مستقبل پر اعلیٰ سطحی سیشنز ہوں گے۔ ایچ بی ایل، نیشنل بینک، ایزی پیسہ، فوجی فرٹیلائزر کمپنی، دبئی اسلامک بینک، بینک آف خیبر، اے سی سی اے، پلاننگ کمیشن، ڈاؤلینس، ایبیکس، کوکا کولا، اسٹیٹ لائف، زاکوری گروپ، فیصل بینک، فاسٹ این یو سی ای ایس، پی ٹی سی ایل گروپ، ٹیراڈیٹا، ایس اے پی اور ایس اینڈ پی گلوبل سمیت متعدد اداروں کے سربراہان اور ماہرین ان مباحثوں میں شریک ہوں گے۔

اختتامی اجلاس پاکستان کی معیشت کے مستقبل پر مرکوز ہوگا جس میں اے کے ڈی سیکیورٹیز اور چائنا انرجی گروپ کے رہنما خصوصی طور پر شامل ہوں گے۔

ماہرین کا کہنا ہے کہ پاکستان بزنس سمٹ پشاور ملک اور خطے میں تجارت، سرمایہ کاری اور معاشی مکالمے کو نئی جہت دینے والا ایک تاریخی سنگ میل ثابت ہوگا۔