بی آر ٹی پشاور میں 10 ارب کی کرپشن کا انکشاف، ریفرنس تیار

پشاور: (دنیا نیوز) بی آر ٹی پشاور میں 10 ارب کی کرپشن کا انکشاف، نیب پشاور نے بی آر ٹی پشاور کرپشن کیس میں ریفرنس تیار کر لیا۔

ذرائع کے مطابق بی آر ٹی پشاور کیس تحقیقات میں نیب کی تحقیقاتی ٹیم نے قومی خزانے کو 10 ارب کے نقصان کا پتا چلایا ہے، نیب ٹیم نے ملزمان کیخلاف شواہد اکٹھے ہونے کے بعد تحقیقاتی رپورٹ تیار کی۔

رپورٹ میں بتایا گیا ہے کہ کنٹریکٹر نے مبینہ طور پر پی ڈی اے کی ملی بھگت سے فراڈ کے ذریعے بی آر ٹی کے ٹھیکے حاصل کیے، بی آر ٹی پر بنی تحقیقاتی رپورٹ میں یہ انکشاف ہوا ہے کہ صوبائی حکومت کے منظور شدہ شیڈول سے کئی گنا زیادہ ریٹ پر ادائیگیاں کی گئی تھیں۔

ذرائع کے مطابق بی آرٹی روٹس کی تعمیر میں ناقص آلات اور میٹریل کا استعمال ہوا تھا، مفرور ملزم مسعود شاہ کے انٹر پول کے ذریعے ریڈ نوٹس جاری کروانے کیلئے ایف آئی اے کو خط لکھ دیا گیا ہے۔

رپورٹ میں بتایا گیا ہے کہ پراجیکٹ کے اخراجات 49 ارب سے 66 ارب روپے تک غیرضروری طور پر بڑھائے گئے تھے، ڈالر ریٹ میں تغیر سے 50 ارب کے قرضے کی مکمل واپسی 150 ارب روپے سے تجاوز کر جائے گی۔

ذرائع کا کہنا ہے کہ سبسڈی کی مد میں صوبائی حکومت سالانہ تین ارب سے زیادہ ادائیگی کر رہی ہے۔